قصيدة "بير المحبة"

أغسطس 06, 2018 Unknown 0 تعليقات

قصيدة زجلية بقلم: علاوي عبد العزيز

جوفي يا بير بالمحبة عمرْ ،،،

رافقني بفرحة نحكي ،،

ساعفني نعبرْ ...

الناس تهدي ل لميمة يومْ ،،،

نهيديها أنا أيامي ،،،

نهديها عمرْ ...

نصنع من حروف الكتبة حجار ،،،

نوقف بها سوار ،،،

نبني بها قصرْ ...

نجعل من حرف القصيدة فراش ،،،

ننسجو ف كلمة ،،،

نفرشو في سطرْ ...

نديرو ليها عش

من ريش النقطة ،،،

نرسمو ليها وكرْ ...

بغيت ليها الحا بساط حنة ،،،

بغيت ليها ،،،

زايي زهرْ ...

النون نوار ،،،

و الواو ،،،

ورد وعطرْ ...

و ما بقى من حروف الكتبة ،،،

كِ سما نعلِّيها ،تحمي ، تدفِّيها ،،،

من برد وسمرْ...

وسامحني يا حرفي ،،،

واخا انت غالي ،،،

غير صغاني ،صبرْ ...

ما نسيت انا فيوم ،،،

اللي كانت ف الشتا دفايا ،،،

وكانت ف ليالي قْمِرْ ...

و الى نريد نحكي عليها ،،،

يلزمني من مدادي بحر ...